Page 3 - heleco-97

Pasis 11 monatoj ekde la apero de la antaŭa numero de ĉi tiu revuo. En ties
prezentado ni pritraktis aspektojn de la socia situacio, mondskale, kiuj tiam
altiris nian atenton: la disvolviĝon de la pandemio de la kron-viruso, la inter-
rasajn kontraŭdirojn… Meritas atenton la evoluo de tiuj problemoj kaj ties

rilato kaj interagado kun aliaj elementoj de la problemaro de nia socio.
La pandemio sekvis sian kurson. Nuntempe, kvankam oni disvolvis kelkajn
vakcinojn, daŭre mortas multaj personoj en la mondo pro tiu pesto, ĉefe en la

ne-disvolviĝintaj landoj, ĉar tie ne eblas la amasa vakcinado kiun oni realigas
en la riĉaj landoj, t. e. la popoloj de la ne-evoluintaj landoj, krom la pesto de la
kron-viruso suferas ankaŭ, kaj ĉefe, la plej naŭzajn sekvojn de tiu pesto nomata

«kapitalismo», la sociekonomia sistemo mondskale dominanta, kies nepra frukto
estas la generado kaj senĉesa pligrandigado de malegaleco inter la homoj kaj
socia ekonomia malekvilibro.

Cetere, eĉ en la alte evoluinta mondo efikis la pandemio malaranĝante, metante
ĥaoson en multajn aferojn. La sanec-servoj ne estis preparitaj por tiaspeca kriza
cirkonstanco kaj tio estis kaŭzo de morto de multaj personoj kiuj ne povis ricevi
la konvenan kuracan flegadon. Krome estis tre damaĝita la socia (kun)vivado

en multaj aspektoj: la spektakloj, la sportaj, kulturaj, religiaj, festaj… renkont-
iĝoj. Ne okazis pasintjare, kaj eble ankaŭ ĉi-jare ne okazos la kongresoj de
Esperanto; ŝajnas ke ankaŭ la Olimpiaj Ludoj de la nuna jaro ne povos okazi…

De antaŭ unu jaro estas devige kovri la vizaĝon per duon-masko kiam oni
eliras for el la hejmo, kaj ŝajnas ke tio ankoraŭ daŭros dum iom da tempo. Oni
konstatis ke kelkaj unu-jaraj infan(in)oj kiuj alkutimiĝis vidi personojn kun
vizaĝo kovrita per duon-masko eksentas timegon kiam vidas iun sen tiu aĵo.

Kaj estas ankaŭ la malfavora efiko kiun la pandemio estas farante sur la eko-
nomio, la produktiga aparato, tiel en la riĉaj kiel en la malriĉaj landoj. Oni
devas atenti pri la sekvoj kiuj rezultos el tiu ekonomia skuo kaj kiamaniere tio

respeguliĝos en la politika realaĵo kaj la vivmaniero. Oni pensas ke pro eblaj
ŝanĝoj rezultontaj el ĉio-ĉi, la pandemio estos kvazaŭ lim-ŝtono inter la epokoj
antaŭ kaj post sia apero.

3